ميثاق (Mithaq)
ميثاق منصة أردنية لتوثيق عقود المقاولة والصيانة مع مقدم الخدمة. تدفع كل مرحلة بعد موافقتك على العمل، وكل دفعة برمز تحقق وسند قبض موقّع.
أسئلة شائعة
شو هو ميثاق بالزبط؟
ميثاق منصة توثيق عقود ودفعات. توقّع العقد إلكترونياً مع مقدم الخدمة، وتنقسم قيمته على مراحل واضحة. أنت تدفع كل مرحلة لمقدم الخدمة مباشرة بعد ما توافق على جودة العمل، ومقدم الخدمة بيوقّع سند قبض إلكتروني بالاستلام. ببساطة: أنت تدفع بعد ما تشوف الشغل، مو قبله، وكل خطوة موثّقة.
هل ميثاق بيحتفظ بفلوسي؟
لا. ميثاق ما بيلمس فلوسك إطلاقاً. بتدفع لمقدم الخدمة مباشرة عبر CliQ. دورنا إننا نوثّق العقد والدفعات ونتأكد إن كل دفعة موقّعة برمز تحقق من الطرفين.
شو قصة "دفعة العربون"؟
بعض العقود بتحدد أول مرحلة كـ"عربون"، بتدفعها لمقدم الخدمة فور ما توقعوا العقد سوا، عشان يقدر يبلش يشتري مواد ويحجز وقته قبل ما يخلص أي شغل فعلي. إذا غيّرت رأيك بعدها بس قبل ما يبلش الشغل على أي مرحلة تانية، فيك تنسحب من العقد، بس بتخسر العربون اللي دفعته. أما لو الشغل بلش فعلاً على مرحلة تانية، ما ينفع الانسحاب من هاي الطريقة.
شو بصير إذا اختلفت مع مقدم الخدمة؟
اضغط "طلب تعديل" على المرحلة ووضّح بالضبط شو اللي ناقص، ومقدم الخدمة بيعيد رفع الشغل المُصحَّح. الدفعة ما تتحرك حتى تكون راضياً تماماً عن النتيجة.
كم رسوم ميثاق؟
ميثاق مجاني للعملاء. مقدم الخدمة يرسل أول 5 عقود مجاناً، وبعدها يحتاج اشتراكاً بـ 20 دينار شهرياً لإرسال عقود جديدة. لا عمولة على أي دفعة. وإذا أُلغي عقد قبل توقيعه، يعود لمقدم الخدمة عقده المجاني.
كيف أبدأ؟
دوّر على مقدم خدمة من صفحة مقدمي الخدمات وابعتله طلب برقم تلفونك. مقدم الخدمة بكتب العقد بمراحله وبيبعته على نفس الرقم، وإنت بتسجّل فيه وبتراجع العقد وبتوقّعه برمز تحقق.
(لمقدمي الخدمات) كيف وإيمتى بوصلني مصاري؟
العميل بدفعلك مباشرة عبر CliQ فور ما يوافق على كل مرحلة. الفلوس بتوصل حسابك أنت مباشرة، بدون ما تمر على ميثاق. بتوقّع سند قبض إلكتروني بالاستلام وبتنفتح المرحلة اللي بعدها أوتوماتيكياً.
(لمقدمي الخدمات) شو إذا العميل ما راجع الشغل اللي رفعته؟
إذا رفعت إثبات إنجاز مرحلة وما رد عليك العميل خلال 7 أيام (لا موافقة ولا طلب تعديل)، بتتوافق المرحلة تلقائياً وبتقدر تكمل عالدفعة. ما رح تضل عالق مستني رد ما بيجي.
(لمقدمي الخدمات) شو بصير إذا العميل ما وافق ع شغلي؟
إذا طلب تعديل، لازم يوضّح بالضبط شو الناقص، وبترفع الشغل المُصحَّح وبيراجعه مجدداً. كل تبادل موثّق بالتاريخ، فما في مجال لمماطلة غير مبررة أو "نسيان" الاتفاق الأصلي.
(لمقدمي الخدمات) كيف أنضم كمقدم خدمة؟
سجّل حساب مقدم خدمة مجاناً، حدد تخصصاتك، وبتخضع لمراجعة سريعة من فريقنا للتأكد من صحة بياناتك. بعدها بتقدر تكتب عقودك وتبعتها لعملائك، وبيوصلك طلبات من العملاء اللي بيلاقوك بصفحة مقدمي الخدمات.